ئه‌وه‌ی که پارله‌مانی هه‌رێمی کوردستان و ئه‌ندامه‌کانی بڕیار له‌سه‌ر مافی فره‌ژنی بۆ پیاوان ده‌ده‌ن، شتێکی چاوه‌ڕوان نه‌کراو نییه، چونکه بۆرژوازی له هه‌موو بوارێکی ژیان و له گشت مه‌یدانێکه‌وه په‌لاماری چه‌وساوه‌کان ده‌دا و گه‌ر به‌رگری و وه‌ستانه‌وه به‌ڕوویدا نه‌بێت، ئه‌وا یاساکانی جه‌نگه‌ڵ بۆ کۆمه‌ڵگه ده‌گێڕنه‌وه. ئه‌مه‌ش ته‌نیا به کۆمه‌ڵگه‌ی کوردستانه‌وه په‌یوه‌ست نییه، به‌ڵکو ئه‌م هێڕشه له سه‌رتاسه‌ری جیهاندا له شێوه‌ی تر و بواری تردا بوونی هه‌یه و ده‌وڵه‌تیش به‌پێچه‌وانه‌ی ئه‌وه‌ی پاگه‌نده‌ی بۆ ده‌که‌ن له هیچ سه‌رده‌مێکدا بێلایه‌ن نه‌بووه و مۆڕی ڕوایه‌تی له‌و بڕیارانه داوه، که له به‌رژه‌وه‌ندی مانه‌وه‌ی چه‌وسانه‌وه‌دان، له‌به‌ر ئه‌وه‌ی که ده‌وڵه‌ت به خۆی ئامرازی چه‌وسانه‌وه و کۆیله‌ڕاگرتنی مرۆڤه‌کانه.
به‌ڵام ئه‌وه‌ی جێگه‌ی سه‌رسوڕمان و چاوه‌ڕوانی نییه خوێنساردی ژنان و پیاوانی ئازادیخوازی کوردستانه، بێهه‌ڵوێستی تاکی کورده به‌گشتی. چونکه کاتێك که ده‌سه‌ڵاتداران و ده‌سه‌لاتخوازان هه‌ڵای ده‌نگدان و هه‌ڵبژاردن سه‌رده‌ده‌ن، به ملیۆن له ژنانی کوردستان سنگ بۆ پارته رامیارییه‌کان و نوێنه‌ره باوکسالاره‌کانیان ده‌کوتن، نارازیانی هێشتاکه گیرۆده به خۆشباوه‌ڕی به ده‌سه‌لات و دیموکراسی بۆرژوازی، له ده‌نگداندا بۆ ئه‌ندام پارله‌مانانه چوارژنخوازه‌کان، نۆره‌بڕی ده‌که‌ن.
ئه‌وه‌ی که پارله‌مانی بۆرژواکان به‌ناوی تاکه‌کانی هه‌رێمی کوردستانه‌وه بۆی ده‌لوێت و بڕیاری وای بۆ ده‌چێته سه‌ر، به‌رهه‌می خۆشباوه‌ڕی تاکه‌کان به پارته‌کان و ده‌سه‌لاتداران، هه‌روه‌ها نائاماده‌ییان بۆ خه‌بات له‌پێناو ئازادی و یه‌کسانی و دادپه‌روه‌ی کۆمه‌ڵایه‌تییه. ئه‌گه‌رنا هه‌ر به‌و ئاماده‌ییه‌ی بۆ ده‌نگدان به بۆرژواکان ده‌ڕژێنه سه‌ر شه‌قامه‌کان، بێنه پای نه‌خێر وتن بۆ ئه‌و بڕیاره، ئه‌وا پارله‌مانتاریسته‌کان و سه‌رۆکه‌کانیان نه‌ك بوێری بڕیاری وایان نابێت، به‌ڵکو له ماڵی خۆشیاندا ئارامییان لێ ده‌بڕێت و بۆ به‌ده‌ستهێنانی ده‌نگی تاکی کورد، ده‌بنه سه‌رچۆپیکێشی یه‌کسانی ژن و پیاو – هه‌ڵبه‌ته به ڕواڵه‌ت و وه‌ك پاگه‌نده بۆ هه‌ڵبژاردن-، چونکه هه‌موو سه‌رکه‌وتنێکی ئه‌وان، له‌سه‌ر پایه‌ی ملکه‌چی و خۆشباوه‌ڕی تاکه‌کان وه‌ستاوه و ده‌وه‌ستێت.
لێره‌دا مه‌به‌ست له‌وه نییه، که هه‌رێمی کوردستان تاکی ئازادیخواز و یه‌کسانیخوازی تێدا نه‌بێت، نه‌خێر به‌ڵکو گرفت له‌وه‌دایه که تاکه ئازادیخوازه‌کان و یه‌کسانیخوازه‌کان به‌سه‌ر پارت و ده‌سته ڕامیارییه ده‌سه‌ڵاخوازه‌کاندا دابه‌ش بوون و ناتوانن له ده‌ره‌وه‌ی سنووری به‌رژه‌وه‌ندی پارت و ده‌سته‌که‌یان هه‌نگاو هه‌ڵگرن، ناتوانن به خۆیان بیر بکه‌نه‌وه و بڕیار بده‌ن. ئه‌مه‌ش بۆ گۆشبوونی تاكی ڕێکخراو له پارته ڕامیارییه‌کاندا ده‌گه‌ڕێته‌وه، که ته‌نیا ڕۆڵی تۆڕی گڵدانه‌وه و ڕاوی تاکه ئازاد و سه‌رنجه بزێوه‌کان ده‌گێڕن. واته ئه‌و تاکه‌ی که له ده‌ره‌وه‌ی ده‌سه‌ڵات نارازییه، به سه‌ره‌داوه‌کانی ده‌سه‌ڵاتخوازی ملکه‌چی بڕیاره‌کانی ده‌سه‌ڵات و نوێنه‌ره‌کانی، به شێوه‌یه‌کی تر و له ڕێگه‌یه‌کی تره‌وه ده‌کرێته‌وه به سه‌ربازی سیسته‌مه‌که.
له وه‌ها بارێکدا نه‌بوونی هوشیاری چینایه‌تی و ده‌رکی ڕێکخراوبوونی چین و توێژه کۆمه‌ڵایه‌تییه ژێرده‌سته‌کان له ڕێکخراوه‌ی سه‌ربه‌خۆی جه‌ماوه‌ری خۆیاندا، بوونه‌ته پارسه‌نگی ناهوشیار راگرتنی تاك و خۆشباوه‌ڕکردنی به به‌ڵێنی سه‌رخه‌رمانی پارته رامکاره‌کان. دیسانه‌وه ئه‌مه ده‌مانگێڕێته‌وه سه‌ر ئه‌و خاڵه‌ی که ده‌بوو بزووتنه‌وه‌ی ئازادیخوازی و یه‌کسانیخوازی حه‌ڤده ساڵ له‌وه‌وبه‌ر لێوه‌ی ده‌ست به‌کار بێت؛ ئه‌ویش هوشیارکردنه‌وه و ڕێکخراوبوون و ڕێکخستنی کۆمه‌ڵگه‌یه له خواره‌وه‌ڕا، که له ئه‌نجامی هێزگرتنی بزاڤه جه‌ماوه‌رییه‌کاندا دێته بوون و له پێگه ئابووری و کۆمه‌لایه‌تی و رامیارییه‌کانی ده‌سه‌لات ده‌دات و پێکهاته‌ی هه‌ره‌می به‌ڕێوه‌به‌رایه‌تی کۆمه‌ڵگه هه‌ڵده‌گێڕێته‌وه.
ئه‌وڕۆ له کاتێکدا که پارله‌مانی بۆرژوازی کورد مۆری ڕه‌وایه‌تی له حه‌ره‌مسه‌راکانی پیاوسالاری ده‌دات، ژێرده‌ستانی هه‌رێمی کوردستان له لاوازترین باری ئاماده‌یی و ڕێکخراوه‌یی دان، له به‌را‌مبه‌ردا نوێنه‌رانی بۆرژوازی – میری هه‌رێم- له بار و ئاماده‌ییه‌کی ته‌واو دان و له‌م ساته‌دا به‌ری خۆسازدانه‌وه‌ی حه‌ڤده ساڵه‌یان ده‌چننه‌وه و بنده‌ستانی هه‌رێمیش باجی که‌مته‌رخه‌می و پرشوبڵاوی و خۆشباوه‌ڕییان به به‌ڵین و پاگه‌نده‌کانی بۆرژوازی کورد ده‌ده‌ن. له‌م ساته‌دا بۆ ئه‌وانه‌ی که دڵیان بۆ ئازادی و یه‌کسانی لێده‌دات، بێجگه له ده‌ستبردن بۆ ئه‌و هه‌نگاوانه‌ی که ده‌بوو حه‌ڤده ساڵ له‌وه‌وبه‌ر بنرایه‌ن، هیچ بوارێکی تر بۆ ده‌رچوون له وه‌ها بارێکی سه‌پێنراوی ئێستادا نییه و به بۆچوونی ئێمه ئه‌مه ته‌نیا ده‌ستبه‌کاربوونه‌وه‌یه به‌و کارانه‌ی که ده‌بوو هه‌نگاوی دواتری بزاڤی سۆڤیه‌ته‌کانی ئازاری 1991 بێت. چونکه ئاڵوگۆڕی کۆمه‌ڵایه‌تی به‌بێ بزاڤی کۆمه‌ڵایه‌تی نایێته بوون؛ بزاڤی کۆمه‌لایه‌تیش کاتێك ده‌توانێت سه‌رکه‌وتنی هه‌نگاوه‌کانی مسۆگه‌ر بکات، که له بواری ئابوری و رامیاری و کۆمه‌ڵایه‌تیدا خه‌باتی جه‌ماوه‌ری به‌رێته پێشه‌وه و بۆ ئه‌م مه‌به‌سته گشت ئامرازه‌کانی خه‌بات هه‌ر له مانگرتن و خۆپیشاندان و ڕێکخراوبوون و میتینگ و شانۆ و موزیك و چیرۆك و ساتیر و هۆنراوه و ڕێکخراوه و ناوه‌نده کۆمه‌کییه کۆمه‌لایه‌تییه‌کان تا ده‌گاته مانگرتنی گشتی وه‌ر بگرێت. ئه‌مه‌ش ته‌نیا به سه‌ربه‌خۆکردن و ده‌رهاویشتنی بزاڤه کۆمه‌ڵایه‌تییه‌کان له سایه‌ی ده‌وڵه‌ت و پارته ده‌سه‌لاتخوازه‌کان و گرێدانه‌وه‌ی بزاڤه سه‌ربه‌خۆ جه‌ماوه‌رییه‌کان له فیدراسیۆنه ئازاده سه‌رتاسه‌رییه‌کاندا ده‌بێته موتۆڕی خه‌باتی ڕۆژانه‌مان.
ئه‌گه‌ر ئێمه له به‌رامبه‌ر بڕیارێکی دیاریکراوی وه‌ك یاسایکردنی چوارژنه بۆ پیاواندا بمانه‌وێت ده‌ست بده‌ینه بزاڤێکی کارا و سه‌ربه‌خۆ ، ئه‌وا پێویسته:
– ده‌ست بۆ پێکهێنانی ڕێکخراوه‌ی جه‌ماوه‌ری چین و توێژه بنده‌سته‌کان؛ کارگه‌ران، فه‌رمانبه‌ران، مامۆستایان، خوێندکاران، بێکاران، خانه‌نشینان، په‌ککه‌وتان و …تد به‌رین، که ژنان به‌شێکی ئه‌م چین و توێژانه پێکده‌هێنن..
– به‌کاربردنی بواره‌کانی ئه‌ده‌ب و هونه‌ر بۆ هوشیارکردنه‌وه و خستنه‌ڕووی ناڕه‌زایه‌تی جه‌ماوه‌ری؛ له‌وانه شانۆ، کۆڕی هۆنراوه‌یی و کۆنسێرتی موزیک و گۆرانی، میتینگی خیابانی و به‌رپاکردنی سیمینار و کۆڕوکۆمه‌ڵی گه‌ڕه‌کی له گشت شار و لادێکاندا.
– به‌ڕێخستنی ڕێپێوان و خۆپیشاندانی به‌رده‌وام، له‌وانه ڕێپێوان له سه‌رتاسه‌ری هه‌رێمی کوردستانه‌وه به‌ره‌و پایته‌ختی هه‌رێم.
– پالامار و داگیرکردنی داموده‌زگه ده‌وڵه‌تییه‌کانی میری هه‌رێم و ڕێکخراوه جیهانییه‌کانی ناو هه‌رێم له‌لایه‌ن کۆمیته‌کانی ژنانه‌وه.
– نه‌چوونه سه‌رکار و داخستنی خوێندنگه و فه‌رمانگه و کارگه‌گه‌لێك که ژنان تێیدا زۆرینه‌ن و کاراییان هه‌یه.
– ده‌ستدانه که‌مکاری و مانگرتنی زنجیره‌یی هه‌ر له کاروباری نێوماڵه‌وه تا ده‌گاته کاروباری کۆمه‌ڵایه‌تی و فه‌رمی.
– بلۆککردنی شاڕێگه‌ی شار و لادێکان، به‌ڕێخستنی میتینگی جه‌ماوه‌ری له ناوه‌ند و شوێنی سه‌ره‌کی شاره‌کاندا.
– ئه‌مانه و چه‌ندین شیوازی تری گونجا و کارا، که ده‌کرێت ئه‌زموون بکرێن. ئه‌مانه‌ی که باسکران، ئه‌و شیوازه کارایانه‌ن، که له زۆرێك له وڵاتانی وه‌ك ئه‌فه‌ریکا، ئه‌مه‌ریکای لاتین، ئۆروپا و …تد ئه‌زموونکراون و کارایی خۆیان هه‌بوو و نه‌ك هه‌ر توانیویانه سه‌روه‌ران له بڕیاره‌کانیان پاشگه‌ز بکه‌نه‌وه، به‌ڵکو زۆرجار میری ولاته‌کانیان ناچار به ده‌ست له کارکێشانه‌وه کردووه.
–
به بڕوای ئێمه واژۆکۆکردنه‌وه و ئاراسته‌کردنی نامه بۆ سه‌رانی میری هه‌رێم و عیراق، نه‌ك نابنه هۆی گۆڕینی بڕیاره‌کان، به‌ڵکو جه‌ماوه‌ری ناڕازیش له چاوه‌ڕوانی و خۆشباوه‌ڕیدا راده‌گرن. ئه‌مه‌ش هه‌مان سه‌ره‌نجامی ده‌بێت، که له حه‌ڤده ساڵی رابوردوودا به‌سه‌رماندا سه‌پاوه و ئه‌وڕۆکه باجه‌که‌ی ده‌ده‌ین. به‌ڵکو سه‌رکه‌وتن و گه‌یشتن به ئامانجه‌کانمان، ته‌نیا له گره‌وی هاتنه‌مه‌یدانی جه‌ماوه‌ری ژنان و پیاوانی ئازادیخواز و یه‌کسانیخواز دایه…
سه‌کۆی ئه‌نارکیستانی کوردستان
04.11.2008